2Cor 7 | NAS | STEP | Ee mmaikoriꞌ, teing aing maraka-antananka nkavampirinooꞌketa kiiroraaꞌmariri oꞌnoriaing teing-eta ookara kapooꞌ niikaang mono eeꞌnoko tanuaang kuꞌmiꞌantavumaing-eta, eeꞌnoko aaꞌnaꞌ paaramariai koontoꞌ meekaꞌmariri otoꞌkoo Kumponing-koo amorompiri.

2 Corinthians 7

1 Ee mmaikoriꞌ, teing aing maraka-antananka nkavampirinooꞌketa kiiroraaꞌmariri oꞌnoriaing teing-eta ookara kapooꞌ niikaang mono eeꞌnoko tanuaang kuꞌmiꞌantavumaing-eta, eeꞌnoko aaꞌnaꞌ paaramariai koontoꞌ meekaꞌmariri otoꞌkoo Kumponing-koo amorompiri.

Koorin-nupoong Bereꞌaririoꞌ Paulaꞌ Dotuaruꞌnaꞌ

2 Domang daateꞌdariri otoriai niiꞌkoo, aiꞌ niiꞌke naning orari-antavampiaꞌ; orakaꞌ nkoampiaꞌ; napoꞌ auraimariaꞌ. 3 Aung tee kara ninge diiꞌ tompintampima minkuampaꞌ, teka teeꞌ tero naurampiruꞌnaꞌ naurampimang diiꞌ teing niiꞌke domange daiꞌdarampiritaaꞌ oꞌnoriaininge, eeꞌnoko moompima deekoꞌ moompiaininge diiꞌ ninka nariꞌ. 4 Ning koontoꞌ diiꞌkoo arooꞌ pankaing oꞌnong. Aaꞌnaꞌ doturotumaramaung diiꞌkoo. Napoꞌ domang aaꞌnaꞌ kuaaꞌantamerimaunge. Eeꞌnoko ookara niikaang-koo arikananka-koo tee doturotue maantoꞌmuma piampumaung.

5 Tenang eeꞌnang Masedoniaꞌnameensiꞌaape meruꞌnang niiꞌ tee niikaang mono uaa-koo koontoꞌ makotuaruuꞌ. Ookutunairu-koo merikoꞌnooꞌka poreꞌanta kuneꞌampikoꞌ, aaꞌning damaꞌdue turang, kuunge avoroꞌ. 6 Teka teie Kumponinge domang mankiꞌnuka kuaaꞌantavurimaunge kuaaꞌantamuruꞌ Taitas tampaꞌ niiꞌanko poꞌantavura. 7 Taitas pouꞌnung narung-koo deeaꞌ, teka diiꞌke domang kuaaꞌantaverikoꞌning pora eeꞌ oroꞌning naumurioꞌ: ning piaamerimaunge eeꞌnoko nkaang tautau taaraverima aaꞌnaꞌ orarunsi ninka bereꞌdariruꞌnunge. Teeꞌ taaramararaiꞌnange dau basinooꞌ dotumarieeng!

8 Bane tero nkaang karavoto daariantuꞌnunge orarunsi-antarampiruꞌnunge, teka ninge enang baruꞌ noruꞌampaꞌ. Aꞌnooꞌ tutung mankiꞌmouꞌnung teeꞌ daarirerompiruꞌnung-koo, teka enang tasiꞌpansi oꞌnong teie karavotoi tamung okiꞌnooꞌkoo orarunsi-antaruruꞌnung. 9 Nka enang dotumaramaung, teka diiꞌ orarunsi-antarampiruꞌnooꞌkoo deeaꞌ, teeo teie diikaange orarunsie orara aarumo-ita bereꞌantaruruꞌnung-koo. Aiꞌ tee temuriiꞌ orarunsi diiꞌke oroꞌantaveruꞌnung tee Kumponinge miruꞌuuꞌnung diiꞌkoo. Teeꞌkoo teeꞌ okiꞌnooꞌ niiꞌke baike-antararampiaꞌ. 10 Tenang nantoong Kumponing piavomanaꞌ orarunsiarima bereꞌariko tee domang-antavurimaung, eeꞌnoko tee-koo domang mankiꞌoroarupeuꞌ, teka kansiꞌ bakaang aarumo siompai orarunsiarima Kumponing-koo domang-anta nkavaavaung. 11 Ooveriai, Kumponing piavomanaꞌ orarunsirariko kapooꞌ arekeeꞌ oroꞌ basiaruꞌ diiꞌkoo. Bakei diiꞌ namuꞌke avoroꞌ ninka tanterarira Kumponing-koo maiaꞌdorira aaꞌnaꞌ arooꞌeri kakeꞌiirariruꞌ tee orara aarumo naninge nkovuuꞌnung ampankeenaꞌ ooveri otoko koomperira simpiriꞌdariiꞌnaang teeꞌ naurampiruꞌnaꞌ. Bakei aaꞌnaꞌ ning diiꞌanko mora pakurampiiꞌnaang piaroruꞌ. Napoꞌ aaꞌnaꞌ noruꞌeruꞌ eeꞌnoko motekaroꞌdariri tee kapooꞌ koontoꞌ deeaung koomperuꞌ. Ookutunairu-koo diiꞌ masikeerariruꞌnung diiꞌ koontoꞌnuka deentariiꞌnaang tenaiꞌkoo tee naning bakanaiꞌkoo.

12 Ninge diiꞌanko temuꞌ daariantuꞌnooꞌ tee diiꞌke niiꞌ aaꞌnaꞌ deto noruꞌmererimanaꞌ Ovoringe siraꞌpuuꞌnaang. Tee naning orakaꞌ nkoaruꞌnung baruꞌ koong-anta-koo deeaꞌ, napoꞌ tee naning orakaꞌ nkovuuꞌnung baruꞌ paku-koo deeaꞌ. 13 Teeꞌ deto noruꞌmererimanaꞌ naumererira niiꞌ tee aaꞌnaꞌ domang kuaaꞌantamerereruꞌnung. Eeꞌnoko daua napoꞌ tee Taitas doturotuari poioꞌ ooampira dotumariruꞌ diiꞌke ookarai teing kapooꞌ naurarampiruꞌning siomperima domang kuaaꞌantaveruꞌnooꞌkoo. 14 Temuꞌ tee aaꞌnaꞌ daangantampikoꞌnung diiꞌ tee-ankoi eeꞌnoko diiꞌ beeroꞌdurima tampaꞌ ooruruꞌnooꞌkoo dotu-antamuuꞌ. Diiꞌke masikee-antaverira maiaꞌantameriaꞌ daangantampikoꞌ nooꞌkoo. Ookara kapooꞌ diiꞌ daangantampima minkuantuꞌning teing masikeng deemparuꞌning teeꞌ ookara kapooꞌ minkurampimaing masikaꞌparamanaꞌ. 15 Eeꞌnoko Taitasie bakei aaꞌnaꞌ noruꞌdurimaung diiꞌ arooꞌketa onkeonkeꞌeruꞌnung-koo amaiaaꞌdori dankurankuꞌdarima. 16 Teeꞌkoo ning bakei dotumaramaung diiꞌ arooꞌdariaining-pinaꞌ noruꞌdampima.